Maaaring nakarinig ka na ng kwento mula sa iyong lolo at lola na nagpapaliwanag ng mga di-pangkaraniwang mga kaganapan tulad na lamang ng pagkabuo ng daigdig o di kaya naman kung saan nagmula ang sanlibutan.
Madalas ang mga kakaibang kwento na ito ay naka-angkla sa alamat, kultura at relihiyon. Ang mga kwentong ito ay tinatawag na mito. Samantala, ang mitolohiya naman ay tumutukoy sa mga koleksyon ng mito sa isang partikular na lugar o bansa.
Iba’t Ibang Mitolohiya Ng Pilipinas
Ang mitolohiya ng Pilipinas ay nakapocus sa kwento ng mga mahiwagang nilalang at kung paano nabuo ang tao at ang mundo. Ilan sa mga popular na mga karakter sa mito ng ating bansa ay sila Bathala, Idianale, at Dumungan. Dahil ang Pilipinas ay nahahati sa libo-libong mga isla, nagkaroon ng mga iba-ibang bersyon ang bawat Mito.
Mayroon ding pagkakaiba sa ng pangalan ang mga Diyos at Diyosa. Halimbawa na lamang ay si Bathala sa mga Tagalog at si Kaptan sa mga Bisaya. Ang mga susunod na mga kwento ay ilan lamang sa mga pinaka sikat na mito ng ating lupang sinilangan.
1.) Ang Kwento ng Pagbuo sa Pilipinas – Noong unang panahon, wala pang lupa. Ang makikita lamang ay ang Langit, Karagatan at isang tila-ibon na nilalang. Ang Ibon ay lumilipad sa pagitan ng Langit at Karagatan. Dahil wala siyang madapuan, napagpasyahan niyang pag-awayin ang dalawang nilalang.
Nag-away nga ang dalawa. Nagpadala ng kidlat si Langit at humampas naman ang alon ng Dagat. Upang mapatigil si Dagat, nagpaulan ang Kalangitan ng mga bato. Ang mga naipong bato ang siyang pinaniniwalaang pinagmulan ng Pilipinas.
2.) Si Malakas at Si Ganda – Ginawa ni Bathala ang lahat ng hayop at halaman dala ng kanyang kalungkutan. Malaparaiso ang sinaunang mundo ngunit walang tao na nakatira rito. Hanggang sa isang araw, may isang ibong lumipad sa himpapawid.
Natanaw nito ang pagkataas-taas na kawayan. Dala ng pagod, ito ay nagpasyang dumapo sa naturang kawayan. Habang nagpapahinga ay nakarinig siya ng tumutuktok sa loob ng halaman. May tinig na nakiusap na sila ay pakawalan.
Noong una ay ayaw ng ibon na biyakin ang kawayan dahil baka ito ay patibong lamang. Ngunit, may Nakita siyang butiki kaya inumpisahan niya itong tinuka. Kinalaunan ay nakawala ang butiki kaya pinagpatuloy na lamang ng ibon ang pagtuktok. Hanggang sa nabiyak ang kawayan at lumabas si Malakas.
Isinunod niya ang isa pang kawayan at doon naman lumabas ang isang mahinhing dilag na ang pangalan naman ay Maganda. Ang dalawa ang siyang nag-umpisa ng lahing kayumanggi.
Mga Mitolohiya ng Iba’t Bansa
Bukod sa mitolohiya ng ating bayan, marami pang mga natatanging alamat ng mga pinagmulan ng tao at mga ibang bansa tulad na lamang ng mitolohiya ng Gresya, Roma, Tsina at Hapon.
Tulad ng ating mga mito, ang kani-kanilang mga istorya ay tungkol din sa kanilang mga pinaniniwalaang mga Diyos, Diyosa at iba pang makapangyarihang nilalang tulad na lamang ng Dragon sa Tsina at Hapon, Pegasus ng Gresya at Basilisk ng Roma.
Tulad ng mga mito ng ating bansa punong-puno din ng pangagaral, mistiko at kwento ng paglalayag at pakikipagsapalaran ang mga mito ng ibang nasyon.
