Ang dinastiya ng Shang ang unang pangkat ng mga dayuhang katutubo na nanirahan sa may ibabang bahagi ng ilog Dilaw o ang Huang Ho. Ayon sa pananaliksik at talaan ng mga Arkeologo masasabing ang dinastiya ng Shang ang lehitimong nauna sa kabihasnan ng Tsina.
Bilang patunay dito ay ang mga katibayan ng mga labi ng kanilang kabihasnan na nahukay sa kanilang lugar. Ang Kabihasnang Shang ay nag-umpisa noong 1600BC. Ang sentro ng kanilang sibilisasyon ay matatagpuan sa kapatagan ng Tsina hanggang sa dulong hilaga ng Shandong at Hebei.
Mga Ambag ng Kabihasnang Shang
- Ang pagkakaroon ng irigasyon at mataas na pamantayan sa pagsasaka.
- Ang paglililok ng mga dekorasyong pambahay na yari sa hade, ivory at clay
- Ang paghahabi ng mga di kalidad na uri ng mga seda.
- Ang paggamit ng mga primitibong lunas sa mga sakit.
- Ang paggamit ng pulang tanso sa paggawa ng mga palayok, kaldero at iba pang gamit sa kusina
- Ang pakikipag-usap sa mga yumao sa pamamagitan ng paggamit ng oracle bones
- Ang paggamit ng Chariot at mga karwaheng pandigma.
- Sa sining ng pagsulat, ang Calligraphy
- Ang pagsusulat ng Oracle Script
- Ang paggamit ng lunar na uri ng kalendaryo
- Ang pag aalala sa ating mga yumaong ninuno
- Pagsamba sa langit at kalikasan
- Ang paggamit ng mga sandatang pandigma gaya ng pana, palakol, at mga helmet na yari sa balat ng hayop.
- Paggamit ng mga kabayo at elepante sa pakikidigma at pagbuhat ng mga kalakal
- Paggamit ng mga instrumento sa musika gaya ng chime na yari sa bato
- Ang paglikha ng kampana at dram na yari sa tansong pula
- Ang pag aaral sa Astronomiya
- Ang paghahati-hati sa trabaho o dibisyon ng paggawa
- Paggawa ng mga seramikang artipaktiko
- Ang pag-aalay o pag-atang ng mga bagay para sa mga ninuno
- Ang pakikipagkalakalan at pagpapalitan ng produkto
- Ang paghuhula at pakikipag-usap sa diyos
Ang dinastiya ng Shang ay unang pinamunuan ni Emperador Cheng Tang. Monarkiya ang uri ng lipunan na kanilang ginamit. Ang mga hari ang taga gawa at tagapamahala ng lahat ng uri ng mga batas. Ang kanilang kaharian ang sentro ng pamamahala sa lahat nang aspeto ng kanilang kabuhayan.
Sa pamumuno ni emperador Tang ay nag-umpisang lumago ang kanilang ekonomiya, agrikultura, industriya pati na ang usaping pulitikal sa kanilang sibilisasyon.
Sa pagdating ng ika-labing pitong hari ng dinastiya ng Shang na si Haring Pangeng, nalipat ang kabisera ng Shang sa Yin. Mula noon ay tinawag ang dinastiya ng Shang na Dinastiya Yin-Shang. Ang diynastiyang ito ay kabilang sa mga “Bronze Age Dynasty”.
Naging malaking bahagi ang paggamit ng bronze o tansong pula sa kanilang pang araw-araw na pamumuhay. Lumago ang kanilang kalakalang pangkabuhayan sa paglikha at paggawa ng sari-saring bagay gamit ang pulang tanso.
Ang pagiging magsasaka at pag-aalaga ng mga hayop ang pangunahing pangkabuhayan ng mga Shang. Sumasamba ang mga Shang sa kalikasan para magkaroon ng magandang panahon at masaganang ani.
Namayagpag ang kapangyarihan ng mga hari sa kabihasnan ng Shang. Itinuro nila sa kanilang mga tao ang pagsasamba sa kaluluwa ng kanilang mga yumaong ninuno at sa kanilang kalikasan. Naniniwala ang kanilang mga hari na ito ang mga nagbibigay ng gabay sa kanila para magkaroon ng kapangyarihan at lakas mula sa kalangitan.
Naging laganap rin ang pag-aalipin noong kabihasnang Shang. Mga matatapang at mapang-api ang mga haring namuno sa panahon na ito. Namayagpag ang mga aristokrata ng lipunan. Labis ang hirap na dinanas ng mga alipin. Nagkaroon ng puwersahang pagsisilbi sa mga hari.
Ang bawat alipin ay kanilang pagmamay-ari, kaya kasabay sa kanilang mga pagyao ay inililibing rin ng buhay ang mga ito bilang mga alay. Ayon sa talaan ng kasaysayan masyadong malupit ang mga magkakasunod na naging hari sa kabihasnan ng Shang.
Si Haring Wuding ang huling hari na namuno sa Shang. Dahil sa kanyang labis na kalupitan at kasamaan sa mga katutubo, ang mga ito ay natutong mag-aklas at nagrebelde laban sa kanyang pamumuno.
Nagkaroon ng sigalot at hindi pagkakaunawaan kaya ang mga Shang ay hindi nakapaghanda sa pagsakop at pakikidigma sa kanila ng dinastiya ng Chou. Sa pagitan ng digmaan ng Shang at Chou ay nagwagi ang dinastiya ng Chou. Natalo at nagapi nila ang mga Shang. Dito na nagsimulang bumagsak at tuluyang natapos ang siglo ng pamamayagpag ng kabihasnan ng mga Shang noong 1045BC.
